ពិភពលោក៖ ​ប្រធានាធិបតីអាមេរិក លោក Joe Biden បានអំពាវនាវឱ្យក្រុមហាម៉ាស់ទទួលយកកិច្ចព្រមព្រៀងបទឈប់បាញ់នៅតំបន់ហ្គាហ្សា ក្នុងអំឡុងខែដ៏ពិសិដ្ឋរបស់សាសនិកមូស្លីម "បុណ្យរ៉ាម៉ាដាន" ខណៈដែលក្រុមសកម្មប្រយុទ្ធប៉ាឡេស្ទីនបានព្រមានថា កិច្ចចរចាសម្រាប់បទឈប់បាញ់ ព្រមទាំងការដោះលែងចំណាប់ខ្មាំងមិនអាចបន្តបានដោយគ្មានលក្ខខណ្ឌកំណត់។

ខណៈដែលគ្រោះទុរ្ភិក្សនៅតែបានបន្តការគំរាមកំហែងដល់ប្រជាជននៃតំបន់ហ្គាហ្សា ថ្មីៗនេះយន្តហោះរបស់សហរដ្ឋអាមេរិក និងយន្តហោះរបស់ហ្ស៊កដានី បានទម្លាក់ជំនួយជាស្បៀងអាហារសាជាថ្មីម្តងទៀតចូលទៅតំបន់ដែលកំពុងមានប្រជាជនប្រមាណ ២,៤លាននាក់កំពុងជាប់គាំង ខណៈប្រតិប​ត្តិការផ្តល់ជំនួយនេះក៏មានការចូលរួមពីប្រទេសអេហ្ស៊ីប និងបារាំងផងដែរ។ ក្រសួងសុខាភិបាលក្នុងតំបន់គ្រប់គ្រងដោយក្រុមហាម៉ាសបានបញ្ជាក់ថា ការទម្លាក់គ្រាប់បែក និងការប្រយុទ្ធគ្នានៅក្នុងសង្គ្រាមដែលអូសបន្លាយនេះ បានបន្តផ្តាច់យកជីវិតមនុស្សសរុបចំនួន ៩៧នាក់ទៀត ខណៈអ៊ីស្រាអែលបានអះអាងអំពីការវាយប្រហារលើគោលដៅសរុបចំំនួន ៥០កន្លែងផ្សេងទៀតនៅត្រឹមមួយថ្ងៃម្សិលមិញនេះ។ 

ក្នុងរដ្ឋធានីរបស់ប្រទេសអេហ្ស៊ីប បេសកជនពិសេសរបស់សហរដ្ឋអាមេរិក និងបេសកជនរបស់ក្រុមហាម៉ាស បានជួបជជែកជាមួយភាគីមកពីអេហ្ស៊ីប និងកាតា ដែលជាការចរចាអូសបន្លាយពេលជាយូរក្នុងគោលបំណងឱ្យមានបទឈប់បាញ់ និងដោះលែងចំណាប់ខ្មាំងមុនពេលមកដល់នៃពិធីបុណ្យរ៉ាម៉ាដាន ដែលនឹងចាប់ផ្តើមនៅថ្ងៃទី១០ ឬថ្ងៃទី១១ ខែមីនាខាងមុខនេះ។ សារព័ត៌មាន Al-Qahera របស់ប្រទេសអេហ្ស៊ីបដែលទទួលបានព័ត៌មានសម្ងាត់មួយបានឱ្យដឹងថា កិច្ចពិភាក្សាបាននិងកំពុងបន្តសម្រាប់រយៈពេលបួនថ្ងៃជាប់ៗគ្នានៅថ្ងៃពុធនេះ។

លោក Joe Biden បានព្រមានទៅកាន់ក្រុមហាម៉ាសឱ្យយល់ព្រមអនុវត្តលើបទឈប់បាញ់នៅតំបន់ហ្គាហ្សាយ៉ាងយូរបំផុតត្រឹមការមកដល់នៃពិធីបុណ្យរ៉ាម៉ាដាន បន្ទាប់ពីរដ្ឋមន្រ្តីការបរទេស លោក Antony Blinken  បានជំរុញឱ្យមានការទទួលយក និងអនុវត្ត "បទឈប់បាញ់ជាបន្ទាន់"។ ប្រធានាធិបតីអាមេរិកបានបញ្ជាក់បន្ថែមថា៖ "ឥឡូវនេះ គ្រប់យ៉ាងគឺស្ថិតនៅក្នុងដៃពួកគេ (ក្រុមហាម៉ាស)ផ្ទាល់"។ លោកបន្ថែមថា៖ "បទឈប់បាញ់មួយត្រូវតែកើតឡើងដោយពិធីបុណ្យរ៉ាម៉ាដាន ពីព្រោះបើយើងបន្តចូលទៅដល់កាលៈទេសៈមួយដែលសង្គ្រាមនៅតែបន្តក្នុងអំឡុងពិធីបុណ្យនេះ នោះស្ថានភាពរបស់អ៊ីស្រាអែល និងក្រុងហ្សេរូសាឡឹម ពិតជាប្រឈមនឹងគ្រោះថ្នាក់ខ្លាំងណាស់"៕